Skip to content

Konflik Pemilu ape Pemilu Konflik

April 10, 2009

Udare berase rade panas ni ari…

Selesei nyontreng Bang Basir kage langsung pulang kerumeh.

Asyik sedakep di baweh poon bacang ngelietin suesane di TPS 3002,

tempatnye kedaftar jadi peserte pemilu.

Gak lame kemudian dateng Neim nyang ikutan ngadem.

***

“Ude nyontreng ente?”

tanye Bang Basir, sambil matenye bedelak delik ke areh bilik suare.

”Udeh Bang. Tuh liat kelingking aye, item.”

Jawab Neim, sambil nyodorin kelingkingnye nyang ade tande warne tintanye.

”Aye peratiin dari tadi nyang dateng cuman segini Im…pade kemane ye orang-orang?” Tanye Bang Basir.

”Pake nanye….

pan kelietan tuh di daftarnye, banyak tetangge kite nyang kage terdaftar.”

Jawab Neim.

”Aye tau Im”.

“Maksud aye nyang terdaftar juge kage nongol semue”

Bang Basir nimpalin lagi.

Bedue-duean masih tetep bediri di baweh poon bacang, udeh kaye anak poon.

***

Kage lame kemudian dari sepeker Mushola nyang kage seberape jauh dari TPS bebunyi ngumandangin azan lohor.

***

“Ayu Im kite ke Musholah dulu”

ajak Bang Basir sambil langsung ngeloyor ngelangkeh.

kage jawab ape-ape, Neim malah jalan ngeduluin Bang Basir ke Musholah.

”Im, ntaran abis sholat kerumeh aye ye…bini gue tadi masak rade banyak”.

“iye-iye…”

jawab Neim sambil terus ngelangkeh pake kage nengok.

***

Keringet dari kepale ngucur kaye getah karet, bibir megap-megap, sambil terus nguyup aer teh tawar kage pake gule, enggak beda Neim juge begitu.

Maklum abis pade makan siang ame sayur asem, rendang jengkol ame ikan peda, lalap daon paya.

Bukannye Bang Basir kage kebeli daging.

Tapi emang entu makanan favoritnye seari-ari.

***

‘Aye denger dari berite, bukan cuman TPS kite doangan nyang wargenye banyak kage terdaftar Bang?”

Neim buka omongan.

”Aye juge dapet informasinye begitu dari surat kabar’.

“Abis mo pegi mane lagi Im…”

Bang Basir nimpalin.

”Sah kage ye pemilu kite”

Neim nanya lagi.

”Mudah-mudahan sah.”

Jawab Bang Basir enteng.

”Lah kok mudah-mudahan bang?”

Tanye Neim lagi.

”Abisnye kalo dimasalahin, bakal merembet ke nyang laen-laen”.

“Kecurangan-kecurangannye pan seabreg-abreg, mo nyalahin siape,

nah nyang curang juge orang-orang parpolnye, nyang pade protes petinggi-petinggi parpolnye, nyang jadi peserte pemilu parpol-parpolnye ame orang-orang parpolnye juge, paling enti ujungnye nyang menang adem ayem, nyang kalah belingsatan, mo jadi ape ni negare sebesar enni Im”.(Bang Basir berenti ngomong sebentar, angkat gelas, die minum).

Mendingan kite nyeritain Kote kite enni,

nyang bentar lagi ulang taon, Im”.

“Iye…ye.Kalo diperatiin Bang, ni kote kite udeh kaye ayam negri Bang, belon seberape umurnye ude gede badannye.”

Neim langsung nimpalin semanget banget, ude kaye caleg dapet suare gede.

”Kagak gitu juge Im. kote kite ni ude mulein berkembang sejak mulein dihuninye Perumnas-perumnas taon tuju puluhan. Jadi ampe sekarang udeh tige puluh atu taon ngebangun. Baru bise kaye sekarang.”

Bang Basir nimpalin lagi.

”Bener Bang, nyang aye inget kote ni ude ngalamin gonta-ganti pimpinan, buat aye sih nyang paling aye inget jamanya Pak Kosir.”

Neim kasih pendapet.

”Entu die Im, Kite harus berfikir bahwe pembangunan enni adaleh hasil rentetan mase lalu ampe ni ari. Bukan hasil dari atu periode pemerintahan doangan, gak bede kaye negeri kite. Nyang ente kudu inget juge, gak mungkin kesempurnaan entu di dapet ari enni. Keberhasilan ame kegagalan pasti ade”

Bang Basir mulein keluar pinternye nih.

“Tapi Bang, kage sedikit juge tuh nyang pade kage puas ame pemerinteh sekarang di kote ni.Pegimane tu?”

Neim mulein rade ngejurus nih.

”Nyang puas ame yang kage puas pasti ade Im. Pan kite kage tau berape jumbleh nyang puas, berape jumbleh nyang kage pade puas. Kite mah rakyat biase Im, nyang penting buat kite terus aje jalanin idup di kote enni sambil ngelakuin ape aje nyang baek buat diri kite, keluarge kite, ame lingkungan kite.”

Jawab Bang Basir makin dalem, kaye sumur dimusim kering.

“Tapi kalo dengerin orang-orang pinteran kok ade aje nyang di bahas.?”

Neim nanye lagi sambil rade mendelik penasaran, kaye kucing ngintip tikus.

“Pan tadi ude aye bilang, kite mah orang biase, rakyat jelate. Mending kite mikir kehidupan nyang lebih panjang ke belakang, ame panjang kedepan, Kagak useh ikut-ikutan mikir buat kepentingan sepintas sambil cari-cari kedudukan ame objekan proyek.”

“Kok Bang Basir berobah sih…kaget aye…”

Neim nyang nimpalin, malah mengkeret kaye tikus mao di terkam kucing.

Bang Basir bangun dari duduknye, ngebet-ngebet kaen sarungnye, sambil matenye melotot ke Neim. Neim ikut bangun dari duduknye, matenye ngelietin Bang Basir, nyang di kirenye bakal marah.

“Ko marah sih Bang…”

Neim ngeluarin omongan rade ragu, kaye tikus dapur nongol di lubangnye.

”Aye kage mareh Im…aye cuman mo nentremin suasane ati aye……aye ke jamban dulu Im…mo nentremin perut nih…..”

Bang Basir ngomong lagi sambil langsung ngacir ngeloyor balik badan ke jamban, tebirit-birit kaye kucing di sebor.

Neim bengong sebentar sambil garuk ubun-ubun, kaye kucing gatel kuping.

“Lagi asyik ade aje gangguan….”

Neim gerutu sendiri, terus megangin perut, ambil langkeh seribu keluar rumeh, kaye tikus di timpuk bakyak.

Kayenye sih mao ikutan ke jamban juge, perutnye mules, gare-gare makan rendang jengkol nyang pedes bikinan mpo Halimeh bininya Bang Basir….

No comments yet

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: