Skip to content

Pemilu ATAWE Referendum…

April 7, 2009

Kayenye sih kage ade nyang lebih endah di ari terik gini selaen nyender di bawah poon sengon sambil ngusek-ngusek muke nyang penuh ame keringet campur daki.

Bukan ape-ape, soalnye Bang Basir ame warge sekitar baru aje selesei kerje bakti ngebersihin saluran aer ame lapangan bulutangkis nyang rencananye sih bakal di jadiin TPS pas pemilu legislatif 9 April ntar.

***

“Bang, kayenye kerje bakti kite bakal jadi sie-sie”

Neim nyang juge nguap bareng Bang Basir ngemulein obrolan.

“Sie-sie nape Im?”.

Ogah-ogahan Bang Basir nimpalin omongan Neim,

maklum keringet ame capenye belon ilang.

”Aye denger di tipi katenye pemilu 9 April bakal di undur Bang”.

Neim ngejawab sambil ngelempengin dengkul nyang ude rade lancip ampir mirip ame ujung ulekan.

”Astagfirullah…Busrak dah!”

Bang Basir kontan mendelik sambil setengah loncat ngangkat pantat, tapi kage kuat, maklum lebar dan berisi.

Badannye maju dikit ngejauhin batang poon nyang lagi di senderin.

”Ape dasarnye Im tuh Pemilu ampe mau di undur?”

Bang Basir serius bangat nanye ke Neim sambil berusahe negakkin punggung nyang depannye keganjel perut.

“Gini Bang,

kate orang nyang ngomong di tipi, katenye sih orang pinter bertitel Bang, ni kali pemilu bakal jadi cacat hukum kalau dilaksanain juge.

Soalnye, ade masaleh ame DPT nye Bang.”

Jawab Neim rade-rade pinter, soalnye jiplak dari tipi.

”Ntu orang nyang ngomong ade masaleh di Daftar Pemilih Tetep punye date kagak?” Timpal Bang Basir lagi.

“Ade Bang, di antaranye  nih, aye sebutin nih Bang, ade anggote TNI/POLRI nyang terdaftar, ade nyang nomer induk kependudukannye satu, orangnye lebih dari atu, ade nyang udeh almarhum masih terdaftar jadi pemilih, ade nyang masih di bawah umur udeh terdaftar jadi pemilih juge, trus di kota kite enni Bang, ade surat suare nyang udeh ade contrengannye buat caleg dari salah satu partai peserte pemilu, gitu Bang nyang aye dapet beritenye.”.

Neim ngejelasin lagi.

Bang Basir ngerutin kulit jidatnye, ampe belipet kaye baju lecek.

Romannye sih ade sesuatu nyang rade berat dipikiran Bang Basir.

“Pegimane tu Bang?”

Tanya Neim sambil meratiin terus roman muke Bang Basir nyang gembil kaye kue cucur. Bang Basir kage langsung ngejawab.

Punggungnye di rapetin lagi ame batang poon, dengkul di tarik atu, tangan pegangan ame dengkul.

“Terus terang Im, ponakan aye juge baru kemaren engeh kalo dirinye kage terdaftar jadi pemilih. Aye tanyain ke Pengurus RTnye, jawabnye die mentah, maaf  kerne lalai dan khilaf. Di jawab gitu aye kage bise berbuat ape-ape, soalnyepan udeh kage mungkin di daftarin lagi. Terus Aye pikir sih wajar aje kalo ade atu dua nyang saleh, kernekan nyang di urus banyak, terus kemampuan dane ame kemampuan pengurus juge terbates, jadi kage mungkin sempurne Im”.

“Nah… nyang Aye khawatirin Im, dalem keterbatas kite sebagai bangse, ade kelompok-kelompok tertentu nyang ngambil keuntungan atawe kelompok-kelompok tertentu nyang sadar kage sadar demen banget bermusuhan ame penguase”.

“Jadi maksud Abang Orang atawe kelompok nyang minte pemilu di under enni sedeng mamanfaatkan situasi gitu?”

Neim nyoba negesin.

“Kage gitu Im. Aye lebih demen kalo ade orang nyang mao cari datanye tentang,..(Bang Basir berenti sebentar ngomong sambil mingserin duduknye).. berape kesalehan nyang bise di bilang akibat dari pade keterbatasan kemampuan, terus berape kesalahan nyang emang akibat dari kecurangan orang atawe kelompok tertentu, nah terus di ambil deh tindakan-tindakan perbaikan ame sanksi nyang sesuai ame peraturan-peraturan terkait pemilu, jadi kage perlu koar-koar debat sana sini sebelum mateng tu persoalan.”.

“Jadi Abang kaga setuju pemilu ditunde?”

Tanye Neim lagi, sambil kipas-kipas muke pake lime jari nyang same tipis kaye kipas kiplik.

“Di tunde atawe kaga ditunde pemilu, warge kecil kaye kite gini mah cuman ngikut aje Im. Paling nyang nentuin juge pare petinggi politik. Untung ame ruginye juge, warge kecil kaye kite gini mah cuman ngikut aje, begitu pan sstem bernegare kite?” 

“Iye juge Bang, padahal kalo mao demokratis dipungut aje suare semacem referendum, buat nentuin nih pemilu ditunda atawe kagak, jangan cuman diputusi ame penguase ame petinggi poltik doangan, iye kagak Bang?”.

Bang Basir bediri pelan-pelan, maklum keberatan badan, terus puter pinggang nyang tebel banget, Neim ngikutin bangun sambil puter pinggang, bereketruk die bunyi.

“Pikiran ente lebih lempeng kayanye, cuman ntar daftar warge nyang ikut referendum dapet dari mane, daftar pemilih dalem pemilu aje belon bise sempurne.”

“Jadi kaye benang kusut ye Bang”

Neim nimpalin lagi.

”Kage Im, kaye usus kusut, udeh jam sebelasan nih perut aye minta di isi…”

Jawab Bang Basir sambil ngelangkeh.

Neim juga ngikut.

”Nyang laen belon pulang Bang, pan masih mao ngecetin pager ame pos ronde”.

“Iye ntar kite balik lagi…perut dulu nih di isi.”

Jawab Bang Basir, sambil terus ngelangkeh rada minggir, takut kelietan nyang laen. “Kali,

Kite bikin referendum aje ye Bang buat nentuin kite boleh ape kaga pulang duluan…”.

Bang Basir melotot ngeliat muke Neim.

Neim saleh tingkeh, sambilan cengar cengir.

Terusan, due-duean ngelangkeh sambil ketawe-ketawe……..

“Ha..ha….”. “he..hee..”.

No comments yet

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: