Skip to content

PEMILU ame “ABG”

Maret 4, 2009

Rade kaget, Bang basir “loncat” dari anggukan ngantuknye.

Bayangin  aje, orang sepeduli Bang basir ame urusan PEMILU

tibe-tibe ngedenger obrolan nyang rade putus ase.

Awalnye sih gare-gare abis sholat lohor tadi, Bang basir kage langsung pulang.

Sender-senderan ke tiang mesjid di teras mesjid nyang emangan adem buat selonjoran.

Lame-lame anggak-anggukkannye kaye burung bango nyari ikan, alias ngantuk.

kage lame kemudian, ade due orang anak sekolahan

nyang numpang ngadem di teras mesjid.

Nah, beduan pade ngobrol dah tuh.

*** 

“Juf, elu mo milih partai ape pemilu nanti?”

Tanye Jalih ke temennye.

“Auh nih”.

“Gue kage begitu paham.

Lah pan, ikut pemilu aje baru mo nyang pertame taon enni”.

“Elu ndiri pegimane?”.

Jawab Jufri sambil balik nanye.

”ye… gue juge same”.

“Baru taon enni umur gue kena ‘wajib’ ikut pemilu.

Tapi paling enggak gue banyak dapet informasi dari tetangge gue nyang ngejabat di partai BERADA.”.

Jawab Jalih lagi.

“Ape katenye Lih?”.

Tanye Jufri…!!!

“Begini Juf…dari mulein peristiwe G-30-S-PKI, dilanjut ame mase kepemimpinan Pak. Harto. Sistem politik nyang di praktekkin di Negare kite enni adalah sistem politik ‘sandiware’.”.

“Maksud lu?”.

“Pade initinye aje deh, kage useh mutar-muter..”

Jufri nyelak, kaye udeh ngebet mao tau

“Sabar Juf. Gue jelasin dulu awal mule ceritenye.”.

“Iye . ayo terusin.”.

“Nah sandiware ntu maksudnye, begini, sebenernye sih udeh ade penguasenye, cuman biar kelietannye demokratis, tetep dah tuh di piare PARPOL ame di adein pemilu.Begitu masuk ke era reformasi, sang penguase tumbang, kage ade lagi penguase tunggal, nah orang-orang nyang tadinye di manje ame penguase atawe emang antek-antek penguase kebanyakan terus pade diriin partai-partai baru, entah sendiri-sendiri atawe berjamaah lagi.”.

Ntar dulu Lih, gue selak sedikit nih…

“Lu jangan kaye profokator, kenyataannye parpol-parpol baru juge banyak dari orang-orang nyang dulunye jadi anak tiri penguase atawe malah dulunye musuh penguasa.”

Jufri nyelak lagi sambil ngegeser dikit duduknye biar lebih lempeng tuh muke ke muke Jalih.

Jalih malah diem melengos, buang muke kage niet, rade mantatin jufri.

Jufri malah jadi bengong rade bingung.

“ dengerin dulu ampe gue abisin omongan ngape sih”.

“Di antare orang-orang di lingkaran penguase nyang dulu juge banyak nyang tetep konsisten ame partainye. Terus parpol-parpol baru juge  banyak nyang pendirinye ngak laen orang-orang nyang sdari dulunye besebrangan ame penguase”.

Jalih berenti cerite.

Ngeliet Jufri nyang kuru, khusu banget ngelietin die.

Beduaan jadi maen liat-liatan.

“Terus sekarang elu udeh yakin nih mao pilih partai BERADA?” .

Jufri mulein lagi buka omongan.

“Emang omongan gue tadi ade hubungannye ke situ ape?.

“Persoalanye bukan cuman entu.

Sekarang ade pertarungan baru antare tokoh tue ame tokoh mude, walaupun lebih pade wacane.”

Jalih nimpalin lagi.

“Nah tu kan gue jadi makin bingung nih”.

“Nyang enni maksudnye pegimane?”.

“Gini juf…

Banyak orang-orang mude nyang sekarang dapet kesempetan buat aktip di parpol, udeh tipis kepercayeannye ame tokoh-tokoh lame. Orang-orang mude enni yakin kalo die pade sanggup ngurus nih negare ngegantiin tokoh-tokoh tue ntu.

Jalih ngejelasin…

“Terus LIH ?”.

Sambung Jufri penasaran.

“Nah tokoh-tokoh nyang merase ‘mude’ entu, terus secare pribadi maupun bersame parpolnye rame-rame pade berebut pengen di pilih ame kite-kite, terutame anak mude nyang baru pertame ikut pemilu. Kaya kite gini.”

Jawab Jalih lagi.

Due-duenye diem bentaran.

Jalih diem sambil nyabutin bulu jenggot nyang sise kage seberape.

Jufri diem sambil nyisir-nyisir rambut pake jari, kage jelas maksudnye ape.

“Terus gue pilih partai apa dong?”

Tanye Jufri, mulein lagi obrolan.

”Nyang penting mah bukan partai ape nyang kite pilih”.

“Gini-ni. Pertame elu cari partai nyang punye perhatian gede ame generasi seumuran kite-kite nih.”

Jalih nimpalin lagi.

“Maksud lu program partainye?”

Tanya Jufri, nyang emang dari stadi bisenye cuman nanye doangan.

”Maksud gue gini juf…”(rade kurang sabar juga jadinye nih Jalih)

“Nyang nguntungin kite…”.

“Ade kegiatan kite nyang danain die, acare kite nyang bise didanain die kaye misalnye, acare bakti sosial nyang danain die, acare piknik, kemping, musik, ame laen-laenanye, semue nyang danain die…tuh baru parpol namanye punye perhatian gede ame generasi seumuran kite enni. Paham lu?”.

”rade nyaring dikit nih kali Jalih ngejelasin.”

O…jadi elu ngejual suare lu buat partai nyang kasih luh uang atawe laen-laennye gitu ?.

Jufri nimpalin rade nyaring juge.

“Juf..Juf….kurang gaul politik lu”.

“Gini..ni Juf…(Jalih ngedeketin mulutnye ke kuping jufri. jufri mingser dikit)

nyang kite butuhin ntu fakte bukan janji-janji mulu kage jelas juntrunganye, kalo nyang namenye kegiatan-kegiatan butuhin dane ame dukungan laenye, terus die bantu, ntu namenye fakte. Kalo nyang namenye  nanti die mao gini…mao gitu…ntu namanye janji.

Gue kage bakalanye nyerahin suare buat ngebelain janji”..

Jufri terus ngusap-ngusap kuping nyang kayenye rade basah ame ludah jalih.

“Jadi partai ape nyang menurut lu kage cuman janji?”

 Jufri nanye lagi.

“pinteran dikit ngape Juf…

lu pikir sendiri dah…

dasarnye gini…nyang dibilang fakte ntu nyang udeh terjadi,

janji ntu nyang baru mao dikerjain atawe di lakonin,

sambil bilang, “enti kalo gue menang gue mao enni..mao entu… dan laen sebageinye.”

Jalih mulein bosen kayenye.

“Tapi kok lu aktif di BERADA, ntu kan partai baru nyang belom kelietan kerjanye” Tanye Jufri lagi.

“Gue mah nyang penting, ape nyang nguntungin gue”.

“Nyang udeh kelietan juge,  cuman belangnye ame itemnye doang kelietan.

Putihnye mah dikit seemprit.?”.

Jufri makin melongo kaye orang linglung.

Jalih mesem-mesem rade ngeledek.

Gak lame, terus jufri teriak…

”Gue GOLPUT…”,

“pusing gue mikirin pemilu, hidup GOLPUT…”.

Jalih malah ketawe-ketawe kaye orang menang lotre. ……

*** 

Sementare Bang basir yang lagi ngelonjor sembari nyempilin tangganye di pangkal pahe, ngedecak-ngedecek sambil geleng-geleng kepale nyang sedari tadian meratiin omongan due bocah ntu…

No comments yet

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: